Jarðskjálftayfirlit

Jarðskjálftavirkni á öllu landinu er lýst í yfirliti sem birt er mánaðarlega á vefnum (frá september 2024). Náttúruvársérfræðingur skrifar yfirlitið sem birt er í annari viku hvers mánaðar. Þar er farið yfir virkni vikunnar á öllum jarðskjálftasvæðum og í eldstöðvarkerfum á landinu. Ef jarðskjálftahrinur eru í gangi, stærri skjálftar eða aðrir markverðir atburðir hafa orðið í vikunni er fjallað sérstaklega um það.

Jarðskjálftayfirlit - september 2026

Um 2500 jarðskjálftar mældust á landinu í september, sem er svipaður fjöldi og í ágúst.

Stærsti skjálfti mánaðarins mældist 4,2 að stærð í vestanverðum Langjökli þann 15. september kl. 14:18. Skjálftinn fannst víða á Suður- og Vesturlandi. Alls mældust sex skjálftar 3 að stærð eða stærri, auk skjálftans í Langjökli. Fjórir þeirra á Reykjaneshrygg dagana 15.–17. september og einn á Tjörnesbrotabeltinu, 3,6 að stærð, um 37 km norðvestur af Grímsey þann 30. september.

Mesta virknin var sem fyrr á Reykjanesskaga, þar sem rúmlega 600 skjálftar mældust. Fjórar afmarkaðar hrinur urðu á landinu í mánuðinum. Þær voru í Brennisteinsfjöllum 4.–5. september, á Reykjaneshrygg 15.–17. september, um 10 km SV við Grímsey 17.–19. september og í Torfajökli 27. september.

Virkni í Torfajökli og Langjökli var talsvert meiri en í ágúst, og á Tjörnesbrotabeltinu mældust einnig fleiri skjálftar. Á Reykjaneshrygg mældust hins vegar um helmingi færri skjálftar en í ágúst, þegar stór hrina varð þar 25. ágúst.

Lesa meira

Jarðskjálftayfirlit - ágúst 2026

Rúmlega 2500 jarðskjálftar mældust á landinu í ágúst.
Fimm skjálftar mældust yfir 3,0 að stærð í mánuðinum, allir tengdir tveimur hrinum á Reykjaneshrygg (11. og 25. ágúst). Stærstu skjálftar mánaðarins mældust 4,1 að stærð, tveir talsins, þann 25. ágúst.
Mesta virknin í mánuðinum var á Reykjaneshrygg, þar sem um 660 skjálftar mældust, og Reykjanesskaga þar sem um 600 skjálftar mældust.
Virkni annars staðar á landinu var hefðbundin miðað við undanfarna mánuði

Í heild var ágústmánuður rólegri en júní og maí, sem einkenndust af óvenju mikilli virkni á Hengilsvæðinu og Bárðarbungu, en svipaður og júlí. Helsta virkni mánaðarins er hrinan á Reykjaneshrygg 25. ágúst þar sem yfir 200 skjálftar mældust á einum degi, þar af tveir yfir 4,0 að stærð.

Lesa meira

Jarðskjálftayfirlit - júlí 2026

Rúmlega 2000 skjálftar mældust á landinu í júlí, þar af eru yfir 1900 skjálftar yfirfarnir. Skjálftarnir dreifðust vítt og breitt um landið og þeir þrír stærstu voru 3,8 í Mýrdalsjökli 15. júlí, 4,1 á Nesjavöllum 27. júlí sem fannst vel á SV-horni landsins, og 5,2 í Bárðarbungu 28. júlí. Smáhrinur urðu á Reykjaneshrygg 25. júlí og úti fyrir Reykjanestá 10. júlí og 30. júlí. Önnur virkni var með hefðbundnu móti.

Lesa meira

Jarðskjálftayfirlit - júní 2026

Í júní mældust yfir 5500 skjálftar, þar af 2736 yfirfarnir, sem er mun meiri fjöldi en síðastliðna fjóra mánuði þegar mældust um 3000 skjálftar að meðaltali. Þó nokkrar skjálftahrinur áttu sér stað í júní en þá einna helst hrina vestur af Húsmúla sem hófst að morgni 31. maí og lauk 4. júní en þá höfðu um 1500 skjálftar mælst, stærsti skjálftinn var 4,5 að stærð þann 1. júní sem fannst vel í byggð, allt frá Akranesi og austur undir Eyjafjöll. Þá mældust um 160 skjálftar í Vífilsfelli 3. til 4. júní. Tvær skjálftahrinur urðu við Þórisjökul sú fyrri 3. til 5. júní þá mældust um 230 skjálftar og sú seinni 23. til 25. júní en þá mældust um 120 skjálftar en þess má geta að það hefur verið stöðug virkni við Þórisjökul þennan mánuðinn. Dagana 13. til 14. júní varð svo hrina í Bárðabungu sem hófst með skjálfta af stærð 4.8, sem er stærsti skjálfti júní mánaðar, en um 500 eftirskjálftar fylgdu. En dregið hefur töluvert úr vikninni við Bárðabungu eftir þessa hrinu. Virkni milli Blöndulóns og Hofsjökuls hefur haldið áfram í júní.

Nánar má skoða skjálftavirkni í Skjálfta-Lísu

Lesa meira