Jarðskjálftayfirlit viku 28, 8.-14. júlí 2024
28. viku ársins mældust um 430 jarðskjálftar á mælaneti Veðurstofunnar. Virknin var dreifð um allt land en einnig var nokkur virkni á Reykjaneshrygg og Kolbeinseyjarhrygg. Stærstu skjálftar vikunnar voru á úthafshryggjunum, þar af tveir sem voru 3,5 að stærð á Kolbeinseyjarhrygg. Stærsti skjálftinn á landi var 2,3 að stærð og varð hann sunnudaginn 14. júlí í Húsfellsbruna, um 5 km vestur af Vífilsfelli.
Nánar er fjallað um jarðhræringar nærri Grindavík í frétt á forsíðu sem er uppfærð reglulega.
Nánar má skoða skjálftavirkni hér: Skjálfta Lísa.
Reykjanesskagi og Reykjaneshryggur
Tæplega 200 skjálftar mældust á Reykjanesskaga og Reykjaneshrygg samtals þessa viku. Markverðast var lítil skjálftahrina við Húsfellsbruna vestur af Vífilsfelli 14. júlí. Tveir skjálftar þar mældust yfir 2 að stærð. Landris er stöðugt í Svartsengi og skjálftavirkni hefur aukist lítillega frá því vikuna á undan á Sundhnúksgígaröðinni og við Grindavík. Einnig mælast skjálftar við Fagradalsfjall. Dreifð virkni mældist vestan við Kleifarvatn og nokkrir skjálftar voru staðsettir í Brennisteinsfjöllum. Á Reykjaneshrygg varð lítil hrina sunnudaginn 14. júlí.
Suðurlandsbrotabeltið og Hengilssvæðið
Á Hengilssvæðinu mældust um 20 skjálftar, dreifðir um svæðið. Lítil sem engin skjálftavirkni var á Suðurlandsbrotabeltinu. Einn skjálfti mældist í Heklu.
Vesturgosbeltið og Mið-Íslandsgosbeltið
Átta skjálftar mældust í vestanverðum Langjökli og þrír í Hofsjökli. Þá mældust tveir skjálftar við Grjótárvatn.
Mýrdalsjökull
og Torfajökulssvæði
Rólegt
var í bæði Mýrdalsjökli og Torfajökli þessa vikuna, aðeins
mældust samtals sex skjálftar. Einn skjálfti var staðsettur í
Eyjafjallajökli.
Vatnajökull
Skjálftavirkni
var með rólegra móti í Vatnajökli þessa vikuna. Skjálftar voru
staðsettir í Öræfajökli, Skeiðarárjökli, Grímsvötnum,
Bárðarbungu og Dyngjujökli. Einn skjálfti mældist við Hálslón
9. júlí. Skjálftar
þar eru ekki algengir en koma þó af og til.
Norðurgosbeltið
Askja og Herðubreið
Við Öskju mældust um 40 skjálftar, bæði við Öskjuvatn og í norðvestanverðum Dyngjufjöllum. Í Herðubreið og Herðubreiðartöglum var einnig virkni, samtals um 40 skjálftar.
Krafla og Þeistareykir
Lítil virkni var við Kröflu og Þeistareyki, samtals 15 skjálftar, heldur fleiri við Þeistareyki.
Tjörnesbrotabeltið
Hefðbundin virkni dreifð um svæðið. Einn skjálfti norðarlega á Tröllaskaga.
Kolbeinseyjahryggur
Um 30 skjálftar voru staðsettir á Kolbeinseyjarhrygg í vikunni, þar af stærstu skjálftar vikunnar. Fjórir skjálftanna voru um 3,5 að stærð.
