Fréttir
borgarísjaki
Borgarísjaki á 66°32'N og 30°33'V kl. 08:43 hinn 2. janúar 2011.

Hafís á norðurhveli aldrei mælst minni

27.8.2012

Hafís á norðurhveli er mestur síðla vetrar og þekur þá 14 - 15 milljónir ferkílómetra. Á sumrin dregst hafísbreiðan verulega saman og fer niður í 5 - 6 milljónir ferkílómetra. Undanfarna áratugi hefur flatarmál breiðunnar minnkað í takt við hlýnun norðurheimskautssvæðisins.Samdrátturinn er meiri að sumarlagi en að vetri til og langminnst varð útbreiðslan sumarið 2007 þegar hafísbreiðan varð rúmlega 4 milljónir ferkílómetrar. (sjá nánar fróðleiksgreinar um hafís.

Þótt næstu ár hafi útbreiðslan að sumarlagi verið langt undir meðallagi varð hún aldrei jafnlítil og árið 2007. Útbreiðsla hafíssins segir heldur ekki alla söguna um ísmagnið á norðurheimskautssvæðinu því að ísinn er þynnri en áður og því er heildarrúmmál íssins minna. Vísindamenn hafa haft áhyggjur af því að þynnri ís ráði verr við aftakahvassviðri, óvenjuhlýja sumardaga eða önnur veðurfyrirbæri sem geta dregið úr útbreiðslunni.

Hafis

Myndin hér að ofan sýnir árstíðasveiflu hafísþekju síðustu áratugi. Myndin sýnir 5 daga meðaltöl, reiknuð úr gögnum frá NSIDC. Árin eru lituð þannig að fyrstu árin (um 1980) eru blálituð en síðustu árin eru rauð. Svarta, þykka línan sýnir árið 2012. Myndin sýnir að í ár hefur hafísinn náð að minnka niður að lágmarkinu frá því árið 2007 og ekkert lát virðist á bráðnuninni. Í venjulegu árferði gæti hafísþekjan haldið áfram að dragast saman næstu 2 - 3 vikur og því ljóst að á árinu 2012 verður til nýtt met.

Líklegt er að hafís sé nú minni en hann hefur verið öldum saman svo að þetta met heyrir til tíðinda.

Heimildir

Kinnard o.fl. (2011) Reconstructed changes in Arctic sea ice cover over the past 1450 years. Nature, 479, 509-12,doi:10.1038/nature10581

NSIDC

Hafíssíður Veðurstofunnar

Halldór Björnsson





Aðrir tengdir vefir



Þetta vefsvæði byggir á Eplica