Sól í hjálmaböndum 10. maí 2016.

Tíðarfar í maí 2016

Stutt yfirlit

1.6.2016

Tíðarfar telst hagstætt; þurrkur háði þó víða gróðri langt fram eftir mánuði. Í síðustu vikunni rigndi óvenjumikið á Snæfellsnesi og á sunnanverðum Vestfjörðum. Hiti var ofan meðallags 1961 til 1990 en þó var að tiltölu kaldara um landið suðvestanvert heldur en í öðrum landshlutum. Þrátt fyrir þurrviðri var veður heldur þungbúið lengst af um landið sunnan- og vestanvert.

Hiti

Meðalhiti í Reykjavík var 6,6 stig, +0,3 stigum ofan meðallags áranna 1961 til 1990, en -0,3 neðan meðallags síðustu tíu ára. Meðalhiti á Akureyri var 6,8 stig, 1,3 stig ofan meðaltals 1961 til 1990 og 0,9 stigum ofan meðallags síðustu tíu ára.

Meðalhita og vik á fleiri stöðvum má sjá í töflu.

Meðalhiti og vik (°C) í maí 2016

Að tiltölu var hlýjast á útnesjum norðanlands og svo á Austurlandi, jákvætt hitavik miðað við síðustu tíu ár var mest á Seyðisfirði, +1,3 stig. Kaldast að tiltölu var suðvestanlands, þar sem hiti var lítillega undir meðallagi síðustu tíu ára á allstóru svæði. Mest var neikvæða vikið í Bláfjallaskála, -0,8 stig.

Meðalhiti mánaðarins var hæstur við Skarðsfjöruvita, 7,5 stig, en lægstur á Brúarjökli -0,8 stig. Í byggð var meðalhitinn lægstur á Grímsstöðum á Fjöllum, 2,2 stig.

Mest frost í mánuðinum mældist -13,3 stig á Brúarjökli þann 17. Mest frost í byggð mældist -7,1 stig í Svartárkoti þann 2. Mest frost á mannaðri veðurstöð mældist á Grímsstöðum á Fjöllum þann 2., -6,7 stig.

Hæsti hiti mánaðarins mældist 21,1 stig þann 26. í Vestdal á Seyðisfirði. Hæsti hiti á mannaðri stöð mældist 19,6 stig á Skjaldþingsstöðum í Vopnafirði þann sama dag.

Úrkoma

Almennt var mánuðurinn í þurrara lagi, sérstaklega syðst á landinu, þar austan við og norður með Austfjörðum. Á þeim slóðum er mánuðurinn í hópi þurrustu maímánaða. Lengi vel var líka útlit fyrir ámóta niðurstöðu um landið vestanvert en mjög mikil úrkoma þar í síðustu vikunni rétti nokkuð úr. Á stöku stað á norðanverðum Vestfjörðum og Norðurlandi rigndi einnig mjög mikið í upphafi mánaðarins og endaði úrkoma ofan meðallags á fáeinum stöðvum á þeim slóðum.  

Úrkoman í Reykjavík mældist 28,0 mm og er það um 64 prósent meðalúrkomu 1961 til 1990 og mánuðurinn þurrasti maí frá 2012. Á Akureyri mældist úrkoman 13,3 mm og er það um 69 prósent meðalúrkomu. Í Stykkishólmi mældist úrkoman 29,7 mm, eða nærri 90 prósent meðalúrkomu.

Dagar þegar úrkoma mældist 1,0 mm eða meiri voru 6 í Reykjavík, 4 færri en í meðalári.  Á Akureyri voru slíkir dagar 4, einum færri en í meðalári.

Þann 27. mældist sólarhringsúrkoma á sjálfvirku stöðinni í Grundarfirði 133 mm. Þetta er meiri úrkoma en mælst hefur á sólarhring á mannaðri veðurstöð hér á landi í maímánuði, en einu sinni hefur meiri sólarhringsúrkoma mælst í maí á sjálfvirku stöðinni í Grundarfirði, 147 mm, það var 26. maí 2012.

Við Stykkishólm

Fjaran við Stykkishólm. Horft er í vesturátt hinn 12. maí 2016. Ljósmynd: Vilhjálmur Smári Þorvaldsson.

Sólskinsstundafjöldi

Sólskinsstundir í Reykjavík mældust 145,9, 46 stundum undir meðallagi áranna 1961 til 1990 og 93 stundum undir meðallagi síðustu tíu ára. Svo fáar sólskinsstundir hafa ekki mælst í maí í Reykjavík síðan 2008. Á Akureyri mældust sólskinsstundirnar 213,2, 39 fleiri en að meðaltali 1961 til 1990 og 53 fleiri en að meðaltali síðustu tíu ár.

Vindur

Meðalvindhraði var um 0,3 m/s undir meðallagi áranna 1961 til 1990 og á sjálfvirku stöðvunum var hann 0,2 m/s undir meðallagi síðustu tíu ára. Vindáttir voru nokkuð óráðnar en þó var eindregin norðanátt dagana 2. til 7. og eindregin sunnanátt 23. til 29. Í hvassviðri þann 26. voru stöðvavindhraðamet maímánaðar slegin á nokkrum vegagerðarstöðvum sem athugað hafa í meira en 15 ár, á Vatnaleið, Öxnadalsheiði, Mývatnsöræfum og á Mývatnsheiði.

Loftþrýstingur

Meðalloftþrýstingur í Reykjavík mældist 1014,5 hPa, 2,0 hPa yfir meðallagi áranna 1961 til 1990. Hæstur mældist þrýstingurinn á Reykjavíkurflugvelli þann 9., 1035,4 hPa, en lægstur 978,8 hPa á Dalatanga þann 2.

Snjór

Snjóþungt var sums staðar inn til landsins á Norðausturlandi langt fram eftir mánuði en annars var víðast hvar snjólítið eða snjólaust í byggðum. Snjórinn norðaustanlands var að mestu fyrnir vetrarins en þó gerði þar töluverða hríð snemma í mánuðinum sem nægði til að snjódýptarmet maímánaðar féllu bæði á Grímsstöðum á Fjöllum (86 cm) og í Reykjahlíð (62 cm). Alautt var allan mánuðinn bæði í Reykjavík og á Akureyri.

Vorið (apríl til maí)

Tíð var fremur hagstæð lengst af. Þurrkur háði þó gróðri um hluta landsins um tíma. Hiti var yfir meðallagi; hann var miðað við 1961 til 1990 (í sviga síðustu tíu ár) +0,8 stigum yfir í Reykjavík (+0,2), +1,3 yfir á Akureyri (+0,5), +1,6 stigum yfir í Stykkishólmi (+0,6) og +0,9 stigum yfir meðallagi á Egilsstöðum (+0,3).

Í Reykjavík var úrkoma um 57 prósent meðallags áranna 1961 til 1990, sú minnsta að vori frá 2008 að telja. Í Stykkishólmi var hún um 48 prósent meðalúrkomu, sú minnsta síðan 2005, en á Akureyri var úrkoma nákvæmlega í meðallagi.

Vindhraði var undir meðallagi á landinu.

Fyrstu fimm mánuðir ársins (janúar til maí 2016)

Í Reykjavík var hiti +0,8 stigum ofan meðallagsins 1961 til 1990 en -0,3 undir meðallagi síðustu tíu ára. Í Reykjavík voru fyrstu fimm mánuðirnir í fyrra talsvert kaldari en nú. Raðast hiti þessa tíma í 32. sæti af 146 í Reykjavík. Á Akureyri var hiti nú +0,5 stigum ofan meðallags sömu mánaða 1961 til 1990 en -0,8 undir meðallagi síðustu tíu ára og raðast í 53. sæti af 135. Fyrstu fimm mánuðir ársins hafa ekki verið kaldari á Akureyri en nú síðan 2002.

Úrkoma er um 80 prósent af meðallagi í Reykjavík en í rétt rúmu meðallagi á Akureyri. Fyrstu fimm mánuðir ársins 2010 voru ívið þurrari í Reykjavík heldur en nú.

Skjöl fyrir maí

Meðalhiti á sjálfvirkum veðurstöðvum í maí 2016 (textaskjal)

Þessa grein, Tíðarfar í maí 2016, er einnig hægt að sækja eða lesa sem pdf.

Daglegt yfirlit mánaðarins á fjórum ákveðnum veðurstöðvum er hægt sækja í sérstaka töflu.