Tíðarfar í janúar 2022
Stutt yfirlit
Janúar var
umhleypingasamur. Hvassviðri voru tíð og töluvert var um
samgöngutruflanir og foktjón. Sjór gekk á land og olli tjóni
bæði á Austur- og Suðvesturlandi í mánuðinum. Suðvestanáttir
voru algengar og úrkomusamt var á Suður- og Vesturlandi. Einkar
hlýtt var á Norður- og Austurlandi 20. og 21. dag mánaðarins.
Hiti
Meðalhiti janúarmánaðar var 1,2 stig í Reykjavík. Það er 0,5 stigum yfir meðallagi bæði tímabilsins 1991 til 2020 og undanfarins áratugar. Á Akureyri var meðalhitinn 0,3 stig sem er 0,8 stigum yfir meðallagi áranna 1991 til 2020 og 0,9 stigum yfir meðallagi 2012 til 2021. Meðalhitinn var 0,2 stig í Stykkishólmi og 1,3 stig á Höfn í Hornafirði.
Meðalhita og vik fleiri stöðva má sjá í eftirfarandi töflu.
| stöð | meðalhiti °C | vik 1991-2020 °C | röð | af | vik 2012-2021 °C |
| Reykjavík | 1,2 | 0,5 | 31 til 32 | 152 | 0,5 |
| Stykkishólmur | 0,2 | 0,1 | 45 | 177 | 0,0 |
| Bolungarvík | -0,5 | -0,4 | 60 | 125 | -0,6 |
| Grímsey | 0,1 | -0,4 | 52 | 149 | -0,8 |
| Akureyri | 0,3 | 0,8 | 26 til 27 | 142 | 0,9 |
| Egilsstaðir | -0,1 | 0,9 | 16 | 68 | 0,5 |
| Dalatangi | 1,9 | 0,2 | 31 | 84 | -0,1 |
| Teigarhorn | 1,2 | 0,2 | 46 | 150 | -0,2 |
| Höfn í Hornaf. | 1,3 | -0,2 | |||
| Stórhöfði | 2,4 | 0,1 | 39 | 146 | 0,1 |
| Hveravellir | -4,9 | 0,1 | 21 | 58 | 0,1 |
| Árnes | 0,4 | 0,6 | 34 | 143 | 0,4 |
Meðalhiti og vik (°C) í janúar 2022.
Að tiltölu var janúar kaldari en að meðallagi undanfarin tíu ár á Vestfjörðum og við Austurströndina, en hlýrri inn til landsins og á Norðveststur- og Suðvesturlandi. Jákvætt hitavik var mest 1,3 stig í Þykkvabæ en neikvætt hitavik var mest -1,1 stig á Raufarhöfn.
Hitavik sjálfvirkra stöðva í desember miðað við síðustu tíu ár (2012-2021)
Meðalhiti mánaðarins var hæstur í Surtsey, 3,5 stig. Lægstur var meðalhitinn -6,3 stig í Sandbúðum og á Þverfjalli. Lægsti meðalhiti í byggð var -3,6 stig á Grímsstöðum á Fjöllum.
Hæstur mældist hitinn í mánuðinum 17,6 stig í Bakkagerði þ. 21. Mesta frost mánaðarins mældist -22,7 stig á Brú á Jökuldal þ. 5.
Úrkoma
Mánaðarúrkoman mældist 142,0 mm í Reykjavík, en það er 63% yfir meðallagi tímabilsins 1991 til 2020. Á Akureyri mældist úrkoma mánaðarins 39,6 mm sem eru 60% af meðalúrkomu áranna 1991 til 2020. Í Stykkishólmi mældist úrkoman 124,5 mm.
Dagar þegar úrkoma mældist 1,0 mm eða meiri í Reykjavík voru 23, átta fleiri en í meðalári. Á Akureyri voru dagarnir 8, eða þremur færri en í meðalári.
Snjór
Janúar var snjóléttur víða um land. Í Reykjavík var jörð alhvít 5 morgna mánaðarins, sjö færri en í meðalári. Á Akureyri voru alhvítir morgnar 9, 13 færri en í meðalári.
Sólskinsstundafjöldi
Sólskinsstundir mánaðarins mældust 11,5 í Reykjavík eða 11,1 klukkustund færri en í meðalári. Á Akureyri mældust 6,8 sólskinsstundir í mánuðinum, 0,3 stundum fleiri en í meðalári.
Vindur
Janúar var umhleypingasamur. Nokkuð var um samgöngutruflanir og foktjón. Sjór gekk á land og olli tjóni, t.a.m. á Borgarfirði eystra þ. 3. og í Grindavík þ. 6.
Vindur á landsvísu var 0,8 m/s yfir meðallagi áranna 1991 til 2020. Suðvestlægar áttir voru tíðar í mánuðinum. Hvassast var þ. 1. (norðaustanátt), þ. 6. (suðaustanátt), dagana 21. til 22. (suðvestanátt) og þ. 25. (suðvestanátt).
Loftþrýstingur
Meðalloftþrýstingur í Reykjavík var 1000,9 hPa. Það er 3,6 hPa yfir meðallagi áranna 1991 til 2020.
Hæsti loftþrýstingur mánaðarins mældist 1033,8 hPa í Árnesi og á Hjarðarlandi þ. 19. Lægsti loftþrýstingur mánaðarins mældist 954,5 hPa á Gufuskálum þ. 6.
Skjöl fyrir janúar
Meðalhiti á sjálfvirkum veðurstöðvum í janúar 2022Daglegt yfirlit mánaðarins á þremur ákveðnum veðurstöðvum er hægt að sækja í sérstaka töflu
