Loftslagsvísindamenn funda í Reykjavík
- vinnufundur um áhrif agna á veðurfar
Dagana 8.-10. október var haldin á Hótel Cabin í Reykjavík alþjóðaráðstefna 40 vísindamanna sem fást við rannsóknir á áhrifum agna í andrúmsloftinu á veðurfar.
Fundurinn fjallaði einkum um agnir sem myndast af mannavöldum, t.d. við bruna kolefnissambanda og við skógarelda. Agnir þessar hafa kólnandi áhrif á veðurfar, og draga því úr hlýnuninni sem stafar af aukningu á styrk gróðurhúsalofttegunda. Áhrif þessara agna á loftslag eru þó mun verr skilin en áhrif gróðurhúsalofttegunda. Þær eru því nokkur uppspretta óvissu þegar kemur að spám um þróun loftslags á komandi áratugum. Til að draga úr þessari óvissu notast vísindamenn við öflug reiknilíkön og nákvæmar athuganir, m.a. frá gervitunglum.
Fundurinn er liður í samvinnu alþjóðlegs vinnuhóps sem nefnist AEROCOM (Aerosol Comparison between Observations and Models).
Hópurinn lagði mikið af mörkum við skrif skýrslu Milliríkjanefndar Sameinuðu þjóðanna um loftslagsbreytingar sem var gefin út í fyrra.
Skipulagning fundarins var samstarfsverkefni Veðurstofu Íslands og Jóns Egils Kristjánssonar, prófessors í veðurfræði við Oslóarháskóla.
