Tíðarfar í október
Stutt yfirlit
Október
einkenndist af norðaustlægum áttum og var úrkomusamur á
Norðaustur- og Austurlandi. Samanborið við sama mánuð undanfarin
tíu ár var mánuðurinn tiltölulega kaldur á norðanverðu
landinu en tiltölulega hlýr á því sunnanverðu. Sólskinsstundir
voru færri en í meðalári á Akureyri og þar var mánaðarúrkoman
sú næstmesta sem mælst hefur þar. Talsvert sólríkara og
úrkomuminna var í Reykjavík. Óvenjumikil úrkoma í upphafi
mánaðar á Norðausturlandi olli miklum skriðuföllum í Kinn og
Útkinn.
Hiti
Meðalhiti í Reykjavík í október var 5,6 stig og er það 0,8 stigum yfir meðallagi áranna 1991 til 2020 og 0,4 stigum yfir meðallagi síðustu tíu ára. Á Akureyri var meðalhitinn 2,8 stig sem er 0,7 stigum undir meðallagi síðustu þriggja áratuga og 1,2 stigum undir meðallagi síðastliðinna 10 ára. Meðalhiti mánaðarins var 4,3 stig í Stykkishólmi. Það er 0,2 stigum undir meðallagi tímabilsins 1991 til 2020 og 0,7 stigum undir meðallagi undanfarinna tíu ára. Á Höfn í Hornafirði var meðalhitinn 5,7 stig, eða um 0,1 stigi yfir meðallagi síðasta áratugar.
Meðalhita og vik á fleiri stöðvum má sjá í eftirfarandi töflu.
| stöð | meðalhiti °C | vik 1991-2020 °C | röð | af | vik 2011-2020 °C |
| Reykjavík | 5,6 | 0,8 | 30 | 151 | 0,4 |
| Stykkishólmur | 4,3 | -0,2 | 73 til 74 | 176 | -0,7 |
| Bolungarvík | 3,2 | -0,5 | 74 | 124 | -1,2 |
| Grímsey | 3,5 | -0,3 | 67 | 148 | -1,1 |
| Akureyri | 2,8 | -0,7 | 83 | 141 | -1,2 |
| Egilsstaðir | 3,2 | -0,5 | 40 | 67 | -1,2 |
| Dalatangi | 5,2 | 0,2 | 35 | 84 | -0,5 |
| Teigarhorn | 5,3 | 0,3 | 36 | 149 | -0,1 |
| Höfn í Hornaf. | 5,7 | 0,1 | |||
| Stórhöfði | 6,1 | 0,6 | 27 til 28 | 145 | 0,3 |
| Hveravellir | -0,6 | 0 | 27 | 57 | -0,4 |
| Árnes | 4,6 | 0,8 | 29 | 142 | 0,5 |
Meðalhiti og
vik (°C) í október 2021
Þegar
hitavik októbermánaðar er skoðað miðað við sama mánuð
undanfarin tíu ár má sjá að almennt höfðu stöðvar á
norðanverðu landinu neikvætt vik en stöðvar á sunnanverðu
landinu jákvætt. Mest var jákvætt hitavik 1,3 stig við Lómagnúp.
Neikvætt hitavik var mest -1,6 stig á Reykjum í Fnjóskadal.
Hitavik sjálfvirkra stöðva í október miðað við síðustu tíu ár (2011-2020)
Meðalhiti mánaðarins var hæstur 7,9 stig á Steinum undir Eyjafjöllum. Lægstur mældist mánaðarmeðalhitinn -2,1 stig í Sandbúðum á Sprengisandi. Lægsti meðalhiti mánaðarins í byggð var -0,1 stig í Svartárkoti.
Hæsti hitinn í október mældist 15,3 stig á Kvískerjum 13. dag mánaðarins. Lægsti hiti mánaðarins mældist -12,3 stig þann 28. í Svartárkoti, sem var jafnframt lægsti mældi hiti í byggð.
Úrkoma
Október var úrkomusamur á Norðaustur- og Austurlandi og úrkoma mældist þar víða vel yfir meðallagi. Mikið rigningarveður gerði á norðaustanverðu landinu í byrjun október, þá sérstaklega á Tröllaskaga og í Kinnarfjöllum. Miklar skriður féllu í Kinn og Útkinn. Einnig var rýmt á Seyðisfirði í mánuðinum vegna möguleika á skriðuföllum í kjölfar úrkomu.
Heildarúrkoma mánaðarins var 55,1 mm í Reykjavík, eða 69% af meðalúrkomu októbermánaðar í Reykjavík á tímabilinu 1991 til 2020. Á Akureyri var heildarúrkoma októbermánaðar 164,8 mm. Það er meira en tvöföld úrkoma meðaloktóbermánaðar árin 1991 til 2020. Úrkoma í október hefur aðeins einu sinni mælst meiri á Akureyri, en það var árið 1995 þegar hún mældist 176,3 mm. Úrkoman mældist 84,0 mm í Stykkishólmi sem er 23% yfir meðallagi og 205,5 mm á Höfn í Hornafirði.
Úrkoma mældist
1,0 mm eða meiri 11 októberdaga í Reykjavík, tveimur færri en að
meðaltali síðustu 30 árin. Á Akureyri mældist úrkoman 1,0 mm
eða meiri 16 daga mánaðarins, en það er 5 dögum yfir
meðaloktóbermánuði á tímabilinu 1991 til 2020.
Snjór
Jörð var alhvít
einn morgun mánaðarins í Reykjavík og alauð aðra daga. Alautt
var á Akureyri allan mánuðinn nema einn dag þegar það var
flekkótt.
Sólskinsstundafjöldi
Sólskinsstundir
mánaðarins mældust 102,3 í Reykjavík og er það 10,7 stundum
yfir meðallagi áranna 1991 til 2020. Á Akureyri mældust
sólskinsstundirnar 32,9 sem er 15,0 stundum undir meðallagi síðustu
þriggja áratuga.
Vindur
Meðalvindhraði
á landsvísu var 0,4 m/s yfir meðallagi októbermánaðar. Hvassast
var þ. 7. (austanátt) og dagana 18. til 19. (norðaustanátt).
Norðaustlægar áttir voru ríkjandi í mánuðinum.
Loftþrýstingur
Meðalloftþrýstingur í Reykjavík var 1000,8 hPa sem er 3,5 hPa undir meðallagi áranna 1991 til 2020.
Hæsti
loftþrýstingur mánaðarins mældist 1026,5 hPa á
Egilsstaðaflugvelli þ. 11. Lægstur mældist loftþrýstingur 965,6
hPa í Surtsey þ. 26.
Fyrstu tíu mánuðir ársins
Fyrstu tíu mánuði ársins var meðalhiti í Reykjavík 6,1 stig. Hann var 0,2 stigum yfir meðallagi tímabilsins 1991 til 2020 en 0,1 stigi undir meðallagi síðustu tíu ára. Meðalhiti fyrstu tíu mánaða ársins í Reykjavík raðast í 21. sæti á lista 151 árs. Á Akureyri var meðalhitinn fyrstu tíu mánuði ársins 5,6 stig, 0,6 stigum yfir meðallagi áranna 1991 til 2020 og 0,3 stigum yfir meðallagi undanfarins áratugar. Meðalhitinn á Akureyri raðast í 8. sæti á lista 141 árs.
Heildarúrkoma fyrstu tíu mánaða ársins var 533,5 mm í Reykjavík og er það 77% af meðalheildarúrkomu sama tímabils undanfarin 30 ár. Fyrstu tíu mánuðir ársins hafa ekki verið eins þurrir í Reykjavík síðan 2010. Á Akureyri var úrkoma fyrstu tíu mánuði ársins 529,7 mm sem er 22% yfir meðallagi áranna 1991 til 2020.
Skjöl fyrir október
Meðalhiti á sjálfvirkum veðurstöðvum í október 2021
Daglegt yfirlit mánaðarins á þremur ákveðnum veðurstöðvum er hægt að sækjaí sérstaka töflu
