Fréttir

Tíðarfar í maí 2023

Stutt yfirlit

2.6.2023


Maí var hlýrri en að meðallagi um allt land, sérstaklega á norðaustan- og austanverðu landinu. Það var sólríkt og þurrt á Norðaustur- og Austurlandi en óvenju þungbúið og úrkomusamt á vestanverðu landinu. Aldrei hafa mælst eins fáar sólskinsstundir í maímánuði í Reykjavík og þar mældist meira en tvöföld meðalmaíúrkoma. Nokkuð var um hvassviðri síðari hluta mánaðar, en þá voru suðvestlægar áttir ríkjandi.

Hiti

Meðalhiti maímánaðar var 6,9 stig í Reykjavík. Það er 0,2 stigum yfir meðallagi tímabilanna 1991 til 2020 og 2013 til 2022. Á Akureyri var meðalhitinn 8,0 stig sem er 1,9 stigi yfir meðallagi áranna 1991 til 2020 og 1,7 stigi yfir meðallagi undanfarins áratugar. Meðalhiti mánaðarins var 6,2 stig í Stykkishólmi og 7,4 stig á Höfn í Hornafirði. Mánuðurinn var hlýr á Austurlandi, en á Egilsstöðum var maí sá næsthlýjasti frá upphafi mælinga.

Meðalhita og vik frá fleiri stöðum má sjá í eftirfarandi töflu.

Meðalhiti (t) í maí 2023 á nokkrum stöðvum. Einnig má sjá vik miðað við meðalhita maímánaðar 1991 til 2020 (vik 30) annars vegar og 2013 til 2022 (vik 10) hins vegar í °C, ásamt röðun meðalhita mánaðarins í samanburði við aðra maímánuði frá því að mælingar hófust.

stöð t vik 30 röð af vik 10
Reykjavík 6,9 0,2 48 til 49 153 0,2
Stykkishólmur 6,2 0,6 34 178 0,5
Bolungarvík 5,6 0,9 24 til 25 126 0,8
Grímsey 4,9 1,2 14 150 0,8
Akureyri 8 1,9 11 143 1,7
Egilsstaðir 8,1 2,6 2 69 2,6
Dalatangi 6,1 1,9 4 86 1,9
Teigarhorn 6,6 1,4 8 151 1,4
Höfn í Hornaf. 7,4


1,2
Stórhöfði 6,5 0,3 44 til 45 147 0,5
Hveravellir 2,6 1,6 7 59 1,1
Árnes 6,9 0,4 42 143 0,5

Maí var hlýr um allt land, en hitavik nýliðins mánaðar miðað við maímánuði undanfarinna tíu ára var jákvætt á öllum veðurstöðvum landsins nema Garðskagavita. Að tiltölu var hlýjast á landinu norðaustan- og austanverðu, einkum inn til landsins. Mest var hitavikið 3,3 stig á Brúaröræfum en hitavikið var -0,1 stig á Garðskagavita.


Hitavik (°C) sjálfvirkra stöðva í maí miðað við síðustu tíu ár (2013 til 2022).

Meðalhiti mánaðarins mældist hæstur 8,3 stig á Hallormsstað en lægstur 0,3 stig á Þverfjalli. Lægsti mánaðarmeðalhiti í byggð mældist 4,0 stig á Fonti á Langanesi.

Hæsti hiti mánaðarins mældist 22,0 stig á Kvískerjum þ. 30. en lægstur mældist hitinn -13,2 stig við Setur þ. 16. Lægsti mældi hiti í byggð var -10,2 stig á Grímsstöðum á Fjöllum þ. 16.

Úrkoma

Úrkomusamt var á vestari helmingi landsins og var mánuðurinn víða á meðal blautustu maímánuða frá upphafi mælinga. Þurrara var á Norðaustur- og Austurlandi, en t.a.m. hefur ekki mælst jafn lítil úrkoma á Skjaldþingsstöðum í maí frá upphafi mælinga þar um miðjan tíunda áratug síðustu aldar.

Heildarúrkoma mánaðarins mældist 120,5 mm í Reykjavík sem er meira en tvöföld meðalúrkoma maímánaða árin 1991 til 2020. Maíúrkoma hefur aðeins þrisvar sinnum mælst meiri í höfuðborginni, úrkomusamast var árið 2018 þegar úrkoman mældist 128,8 mm. Á Akureyri mældist mánaðarúrkoman hins vegar aðeins 14,2 mm, eða sem nemur um 60% meðallags maíúrkomu tímabilsins 1991 til 2020. Í Stykkishólmi mældust 83,6 mm sem er u.þ.b. tvöföld meðallagsúrkoma. Þar hefur aðeins fjórum sinnum mælst meiri úrkoma í maí frá upphafi mælinga árið 1857.

Fjöldi daga þegar úrkoma mældist 1,0 mm eða meiri var 24 í Reykjavík sem er 14 dögum yfir meðallagi áranna 1991 til 2020. Á Akureyri mældist svo mikil úrkoma 6 daga mánaðarins, eða einum degi oftar en að meðallagi. Í Stykkishólmi mældist úrkoma 1,0 mm eða meiri 16 daga mánaðarins, eða helmingi oftar en í meðalmaímánuði.

Snjór

Jörð var alauð alla morgna mánaðarins bæði í Reykjavík og á Akureyri.

Sólskinsstundafjöldi

Í Reykjavík mældust 95,9 sólskinsstundir í mánuðinum, en þær hafa aldrei mælst eins fáar frá upphafi mælinga árið 1911. Fjöldi sólskinsstunda í höfuðborginni þennan maímánuðinn náði einungis um 46% meðallags tímabilsins 1991 til 2020, en hann var 113,1 stund undir því. Hins vegar var mánuðurinn sólríkur á Akureyri, en þar mældust 202,3 sólskinsstundir sem er 31,3 stundum yfir meðallagi.

Vindur

Vindur á landsvísu var 0,7 m/s yfir meðallagi áranna 1991 til 2020. Umhleypingasamt var á landinu síðari hluta mánaðar og féllu tíu mínútna meðalvindhraðamet maímánaðar allnokkurra sjálfvirkra veðurstöðva í mánuðinum, en margar eiga þær yfir 20 ára mælisögu. Eins mældust mestu hviður sem mælst hafa í maí á sumum sjálfvirkum veðurstöðvum í nýliðnum mánuði. Suðvestlægar áttir voru ríkjandi í mánuðinum, sérstaklega síðari hluta mánaðar. Hvassast var 20. (suðvestlæg átt), 23. (suðvestlæg átt) og 24. (suðlæg átt) daga mánaðarins.

Loftþrýstingur

Meðalloftþrýstingur í Reykjavík mældist 1010,5 hPa, en það er 2,5 hPa undir meðallagi maímánaða áranna 1991 til 2020.

Hæsti loftþrýstingur mánaðarins mældist 1034,8 hPa á Kambanesi þ. 3. Lægstur mældist loftþrýstingurinn 977,2 í Bolungarvík þ.23.

Fyrstu fimm mánuðir ársins

Meðalhiti í Reykjavík fyrstu fimm mánuði ársins mældist 2,2 stig, eða 0,4 stigum undir meðallagi fyrstu fimm mánaða áranna 1991 til 2020. Meðalhitinn í Reykjavík það sem af er ári raðast í 58. sæti á lista 153 ára. Á Akureyri mældist meðalhiti janúar til maí 1,7 stig sem er 0,3 stigum yfir meðallagi 1991 til 2020. Meðalhiti mánaðanna fimm á Akureyri raðast í 33. sæti á lista 143 ára.

Heildarúrkoma ársins hingað til mældist 428,0 mm í Reykjavík, en það er um 16% yfir meðallagi tímabilsins 1991 til 2020. Á Akureyri mældist heildarúrkoman 167,3 mm, eða um 80% af meðalúrkomu áranna 1991 til 2020.

Vorið (apríl og maí)

Vorið var hlýtt um allt land. Úrkomusamt var í Reykjavík en þurrt og sólríkt á Akureyri. Vorúrkoma í Reykjavík mældist 207,5 mm sem er um 90% umfram meðalvorúrkomu áranna 1991 til 2020. Á Akureyri mældust 35,9 mm þetta vorið, eða um 70% af meðalúrkomu áranna 1991 til 2020.

Skjöl fyrir maí

Meðalhiti á sjálfvirkum veðurstöðvum í maí 2023 (textaskjal).
Daglegt yfirlit mánaðarins á þremur veðurstöðvum er hægt að sækja í sérstaka töflu.
















Aðrir tengdir vefir



Þetta vefsvæði byggir á Eplica