Tíðarfar í júní 2024
Stutt yfirlit
Júní var tiltölulega kaldur á landinu öllu, sérstaklega norðaustanlands. Nokkuð langvinnt norðanhret gekk yfir landið í byrjun mánaðar. Óvenjumikið snjóaði á norðanverðu landinu miðað við árstíma sem olli töluverðum vandræðum. Bændur lentu í tjóni, einhvað var um fugladauða og samgöngutruflanir voru á fjallvegum.
Hiti
Meðalhiti í Reykjavík í júní var 8,7 stig. Það er 1,1 stigi undir meðallagi áranna 1991 til 2020 og líka 1,1 stigi undir meðallagi síðustu tíu ára. Á Akureyri var meðalhitinn 8,2 stig, 1,4 stigum undir meðallagi áranna 1991 til 2020 en 2,3 stigum undir meðallagi síðustu tíu ára. Í Stykkishólmi var meðalhiti mánaðarins 8,1 stig og 8,7 stig á Höfn í Hornafirði.
Meðalhita og vik frá fleiri stöðum má sjá í eftirfarandi töflu.
| stöð | meðalhiti °C | vik 1991-2020 °C | röð | af | vik 2014-2023 °C |
| Reykjavík | 8,7 | -1,1 | 119 | 154 | -1,1 |
| Stykkishólmur | 8,1 | -0,8 | 107 til 108 | 179 | -1,1 |
| Bolungarvík | 7,3 | -0,9 | 86 | 127 | -1,3 |
| Grímsey | 5,5 | -1,1 | 98 | 151 | -2,0 |
| Akureyri | 8,2 | -1,4 | 111 | 144 | -2,3 |
| Egilsstaðir | 7,8 | -1,1 | 54 | 70 | -2,0 |
| Dalatangi | 6,5 | -0,3 | 42 | 86 | -0,8 |
| Teigarhorn | 7,5 | -0,3 | 62 | 152 | -0,9 |
| Höfn í Hornaf. | 8,7 | -0,9 | |||
| Stórhöfði | 8,1 | -0,6 | 98 til 99 | 148 | -0,5 |
| Hveravellir | 4,5 | -1,7 | 48 | 60 | -2,1 |
| Árnes | 9,3 | -0,7 | 90 til 91 | 145 | -0,8 |
Hitavik (°C) sjálfvirkra stöðva í júní miðað við síðustu tíu ár (2014 til 2023).
Júní var kaldur á öllu landinu og hiti var undir meðallagi á öllum veðurstöðvum. Að tiltölu var kaldast á Norðausturlandi en hlýjast á Suðurlandi. Neikvætt hitavik miðað við síðustu tíu ár var mest -3,0 stig á Grímsstöðum á Fjöllum en minnst -0,2 stig á Vatnsskarðshólum.
Hitavik
(°C) sjálfvirkra stöðva í júní miðað við síðustu tíu ár (2014 til 2023).
Meðalhiti mánaðarins var hæstur í Öræfum 10,1 stig. Lægstur var meðalhitinn á Gagnheiði, 1,4 stig. Á láglendi var meðalhitinn lægstur 4,4 stig á Fonti á Langanesi.
Hæsti hiti mánaðarins mældist 25,4 stig á Bakkagerði á Borgarfirði eystri þ. 30. Mest frost í mánuðinum mældist -6,2 stig á Gagnheiði þ. 3. og 4. Mest frost í byggð mældist -3,0 stig í Möðrudal þ. 4.
Úrkoma
Júní var óvenjulega úrkomusamur á Norðausturlandi.
Úrkoma í Reykjavík mældist 59,3 mm sem er um 35% umfram meðalúrkomu áranna 1991 til 2020. Júní var óvenjulega úrkomusamur á Norðausturlandi. Á Akureyri mældist úrkoman 54,9 mm sem er meira en tvöföld meðalúrkoma áranna 1991 til 2020. Júníúrkoma hefur aðeins fimm sinnum mælst meiri á Akureyri, síðast árið 2005.
Dagar þegar úrkoma mældist 1,0 mm eða meiri í Reykjavík voru 10 sem er 1 fleiri en í meðalári. Á Akureyri mældist úrkoma 1,0 mm eða meiri 11 daga sem er 7 fleiri en í meðalári.
Snjór
Það snjóaði óvenjulega mikið miðað við árstíma á Norðurlandi í norðanhreti sem gekk yfir landið í byrjun júní. Mest mældist snjódýptin á Vöglum í Vaglaskógi (43 cm þ. 5.), Grímsstöðum á Fjöllum (32 cm þ. 4.), Dalsmynni í Hjaltadal (19 cm þ. 6.), Sökku í Svarfaðardal (15 cm þ. 5.), Þverá í Dalsmynni (13 cm þ. 5.). Á þessum stöðvum er þetta mesta mælda snjódýptin sem vitað er um í júní, það er af nýföllnum snjó. Snjórinn hélst í nokkra daga og því er fjöldi alhvítra daga einnig óvenjulega mikill á þessum stöðvum. Á Grímsstöðum á Fjöllum voru alhvítir dagar t.a.m. 6 sem er það mesta þar síðan árið 1990. Það snjóaði á Akureyri, en þar var þó engin alhvítur dagur skráður í júní, en einn flekkóttur.
Snjórinn olli miklum vandræðum. Bændur lentu í tjóni, fjöldi fugla dóu og töluverðar samgöngutruflanir voru á fjallvegum.
Sólskinsstundafjöldi
Sólskinsstundir í Reykjavík mældust 197,5 sem er 8 stundum yfir meðallagi áranna 1991 til 2020. Á Akureyri mældust sólskinsstundirnar 187,9 sem er 2 stundum undir meðallagi áranna 1991 til 2020.
Vindur
Það var nokkuð hvasst á landinu í júní. Vindur á landsvísu var um 1,0 m/s yfir meðallagi áranna 1991 til 2020. Hvassast var dagana 4. og 5. (norðanátt).
Loftþrýstingur
Meðalloftþrýstingur í Reykjavík mældist 1008,8 hPa og er það 3,8 hPa undir meðallagi áranna 1991 til 2020.
Hæsti loftþrýstingur mánaðarins mældist 1025,8 hPa á Sauðárkróksflugvelli þ. 10. Lægstur mældist loftþrýstingurinn 986,1 hPa á Vattarnesi þ. 22.
Fyrstu sex mánuðir ársins
Meðalhiti í Reykjavík fyrstu sex mánuði ársins var 3,2 stig sem er 0,5 stigum undir meðallagi áranna 1991 til 2020. Meðalhiti fyrstu sex mánaða ársins raðast í 64. hlýjasta sæti á lista 154 ára. Á Akureyri var meðalhiti mánaðanna sex 2,0 stig sem er 0,8 stigum undir meðallagi áranna 1991 til 2020. Meðalhitinn þar raðast í 71. hlýjasta sæti á lista 144 ára.
Heildarúrkoma í Reykjavík fyrstu sex mánuði ársins mældist 353,6 mm sem er um 85% af meðalúrkomu áranna 1991 til 2020. Á Akureyri mældist heildarúrkoma mánaðanna sex 296,7 mm sem er um 30% umfram meðalúrkomu áranna 1991 til 2020.
Skjöl fyrir júní
Meðalhiti á sjálfvirkum veðurstöðvum í júní 2024
(textaskjal).
Daglegt yfirlit mánaðarins á þremur veðurstöðvum er hægt að sækja í sérstaka töflu.
