Tíðarfar í júní 2021

Stutt yfirlit

2.7.2021

Júní var fremur kaldur. Mjög kalt var á landinu dagana 11. til 20. Það frysti og snjóaði víða í byggð og gróðri fór hægt fram. Í lok mánaðar var aftur á móti mjög hlýtt, sérstaklega á Austur- og Norðausturlandi og fór hitinn þar víða vel yfir 20 stig nokkra daga í röð. Hlýindunum fylgdu miklar leysingar eftir kalt vor með tilheyrandi vatnavöxtum í ám og lækjum.

Hiti

Meðalhiti í Reykjavík í júní var 8,6 stig og er það -1,2 stigum undir meðallagi áranna 1991 til 2020 en -1,4 stigum undir meðallagi síðustu tíu ára. Júní hefur ekki verið eins kaldur í Reykavík síðan 1997. Á Akureyri var meðalhitinn 9,9 stig, 0,3 stigum yfir meðallagi áranna 1991 til 2020, en -0,1 stigi undir meðallagi síðustu tíu ára. Í Stykkishólmi var meðalhitinn 8,3 stig og 8,6 stig á Höfn í Hornafirði.

Meðalhita og vik á fleiri stöðvum má sjá í töflu.

Meðalhiti og vik (°C) í júní 2021

Júní var fremur kaldur. Mjög kalt var á landinu um miðjan mánuðinn (dagana 11. til 20.). Það frysti og snjóaði víða í byggð. Í lok mánaðar var aftur á móti mjög hlýtt á Austur- og Norðausturlandi og fór hitinn þar víða vel yfir 20 stig nokkra daga í röð. Mánuðurinn var að tiltölu kaldastur suðvestanlands og á sunnanverðu hálendinu, á meðan hlýrra var norðan- og austanlands. Neikvætt hitavik miðað við síðustu tíu ár var mest -2,3 stig í Þúfuveri en jákvætt hitavik miðað við síðustu tíu ár var mest 1,0 stig á Gjögurflugvelli.

Hitavik sjálfvirkra stöðva í júní miðað við síðustu tíu ár (2011-2020)

Meðalhiti mánaðarins var hæstur í Öræfum 9,8 stig en lægstur 2,3 stig á Gagnheiði og á Þverfjalli. Á láglendi var meðalhitinn lægstur 5,7 stig í Seley við Reyðarfjörð.

Hæsti hiti mánaðarins mældist 26,6 stig á Egilsstaðaflugvelli þ. 30. Það var líka mjög hlýtt þann 29. og þá mældist hitinn hæstur á Hallormsstað, 26,4 stig. Hæsti hiti á mannaðri veðurstöð mældist á Skjaldþingstöðum 25,9 stig þ. 30.

Mest frost í mánuðinum mældist -6,7 stig á Gagnheiði þ. 15. Mest frost í byggð mældist -5,0 stig í Reykjum í Fnjóskadal þ. 15. Það er mesta frost sem mælst hefur í byggð svo seint í júní.

Úrkoma

Úrkoma í Reykjavík mældist 39,1 mm sem er 90% af meðalúrkomu áranna 1991 til 2020. Á Akureyri mældist úrkoman 12,9 mm sem er um 60% af meðalúrkomu áranna 1991 til 2020. Í Stykkishólmi mældist úrkoman 29,3 mm og 117,3 mm á Höfn í Hornafirði.

Dagar þegar úrkoma mældist 1,0 mm eða meiri í Reykjavík voru 11, tveimur fleiri en í meðalári. Á Akureyri mældist úrkoma 1,0 mm eða meiri 5 daga mánaðarins, einum fleiri en í meðalári.

Sólskinsstundafjöldi

Sólskinsstundir í Reykjavík mældust 152,0 sem er 37,5 stundum undir meðallagi áranna 1991 til 2020.

Á Akureyri mældust sólskinsstundirnar 204,1, sem er 21 stund yfir meðallagi áranna 1991 til 2020.

Vindur

Vindur á landsvísu var 0,6 m/s yfir meðallagi áranna 1991 til 2020.

Loftþrýstingur

Meðalloftþrýstingur í Reykjavík mældist 1008,7 hPa og er það -3,9 hPa undir meðallagi áranna 1991 til 2020.

Hæsti loftþrýstingur mánaðarins mældist 1029,6 hPa í Surtsey þ. 24. Lægstur mældist þrýstingurinn 978,7 hPa í Surtsey þ. 10.

Fyrstu sex mánuðir ársins

Meðalhiti í Reykjavík fyrstu sex mánuði ársins var 3,7 stig sem er jafnt meðallagi áranna 1991 til 2020 en 0,4 stigum undir meðallagi síðustu tíu ára. Meðalhitinn raðast í 39. sæti á lista 151 ára. Á Akureyri var meðalhiti mánaðanna sex 2,8 stig. Það er 0,1 stigi undir meðallagi áranna 1991 til 2020, en 0,6 stigum undir meðallagi síðustu tíu ára. Meðalhitinn þar raðast í 41. sæti á lista 141 ára.

Það hefur verið þurrt í Reykjavík það sem af er ári, úrkoman hefur verið um 65% af meðalúrkomu áranna 1991 til 2020. Á Akureyri er heildarúrkoma mánaðanna sex jöfn meðalúrkomu áranna 1991 til 2020.

Skjöl fyrir júní

Meðalhiti á sjálfvirkum veðurstöðvum í júní 2021 (textaskjal).
Daglegt yfirlit mánaðarins á þremur ákveðnum veðurstöðvum er hægt að sækja í sérstaka töflu.