Tíðarfar í janúar 2016
Stutt yfirlit
Tíð telst fremur hagstæð; hiti var víðast hvar rétt ofan meðallags áranna 1961 til 1990 en neðan meðallags síðustu tíu ára. Kalt var í veðri inn til landsins á landinu norðanverðu. Úrkoma var undir meðallagi um meginhluta landsins, og á fáeinum stöðvum um landið norðvestanvert var þetta þurrasti janúar um langt skeið.
Hiti
Meðalhiti í Reykjavík var +0,2 stig, 0,7 stigum ofan meðallags áranna 1961 til 1990 en -1,0 stigi undir meðallagi síðustu tíu ára. Meðalhiti á Akureyri var -2,6 stig, -0,4 stig undir meðallagi áranna 1961 til 1990 en -2,6 stigum undir meðallagi síðustu tíu ára. Þetta er kaldasti janúar á Akureyri síðan 1995 en í Reykjavík var lítillega kaldara í fyrra heldur en nú.
Meðalhita og vik á fleiri stöðvum má sjá í töflu.
| stöð | hiti | vik 1961 - 1990 | röð | af | vik 2006 - 2015 |
| Reykjavík | 0,2 | 0,7 | 57 til 58 | 146 | -1,0 |
| Stykkishólmur | -0,2 | 1,1 | 58 | 171 | -1,0 |
| Bolungarvík | 0,1 | 1,3 | 38 | 119 | -0,4 |
| Grímsey | 0,8 | 2,0 | 28 | 143 | -0,3 |
| Akureyri | -2,6 | -0,4 | 82 | 135 | -2,7 |
| Egilsstaðir | -2,5 | 0,1 | 36 | 62 | -2,3 |
| Dalatangi | 1,2 | 0,8 | 35 | 78 | -1,1 |
| Teigarhorn | 0,3 | 0,5 | 58 til 59 | 144 | -1,2 |
| Höfn í Hornafirði | 0,4 | 0,4 | -1,1 | ||
| Stórhöfði | 2,0 | 0,7 | 49 | 140 | -0,7 |
| Hveravellir | -6,6 | 0,0 | 32 | 51 | vantar |
| Árnes | -1,3 | 0,7 | 56 | 137 | -1,0 |
Að tiltölu var hlýjast við norðurströndina og á Vestfjörðum, þar sem hiti var á fáeinum stöðvum rétt við meðallag síðustu tíu ára, næst því á Flateyri og á Patreksfirði, -0,1 stig. Kaldast að tiltölu var inn til landsins á austanverðu Norðurlandi, stærsta neikvæða vikið, miðað við síðustu tíu ár, var -3,3 stig í Möðrudal og við Mývatn.
Meðalhiti mánaðarins var hæstur í Surtsey, +3,2 stig, en lægstur við Kárahnjúka -6,8 stig. Í byggð var meðalhitinn lægstur í Möðrudal, -6,6 stig. Talsvert vantaði af athugunum frá mörgum hálendisstöðvum og var mánaðarmeðalhiti þeirra því ekki reiknaður.
Mest frost í mánuðinum mældist -24,7 stig við Mývatn þann 15. Mest frost á mannaðri veðurstöð mældist -19,4 stig á Grímsstöðum á Fjöllum þ. 15.
Hæsti hiti mánaðarins mældist á Mörk á Landi þann 22., 12,0 stig. Þann dag voru janúarstöðvamet slegin á nokkrum stöðvum um landið sunnan- og vestanvert. Hæsti hiti á mannaðri stöð, 9,5 stig, mældist á Dalatanga þann 23. og þann 24. á Skjaldþingsstöðum.
Úrkoma
Úrkoma var undir meðallagi. Á nokkrum stöðvum á Vestfjörðum, við innanverðan Breiðafjörð, í Hrútafirði og vestantil í Húnavatnssýslu, virðist hún hafa verið minni en áður hefur mælst á þeim slóðum. Endanlegt uppgjör liggur þó ekki fyrir, þannig að hægt sé að skera úr um það með fullri vissu enn sem komið er.
Úrkoman í Reykjavík mældist 61,5 mm og er það um um 20 prósent undir meðalúrkomu áranna 1961 til 1990 – ekki mjög óvenjulegt. Á Akureyri mældist úrkoman 51,5 mm og er það um 7 prósent undir meðallagi. Í Stykkishólmi var úrkoman aðeins rétt rúmur helmingur meðalúrkomu, þurrara var þó þar í janúar 2014. Úrkoma mældist 152,1 mm á Höfn í Hornafirði.
Dagar þegar úrkoma mældist 1,0 mm eða meiri voru 10 í Reykjavík, 3 færri en í meðalári. Á Akureyri voru slíkir dagar 8, 3 færri en í meðalári eins og í Reykjavík.
Sólskinsstundafjöldi
Sólskinsstundir í Reykjavík mældust 22,2 og er það 4,7 stundum undir meðallagi áranna 1961 til 1990. Á Akureyri mældust sólskinsstundirnar 11,1; 4,6 fleiri en í meðalári og flestar í janúar frá 2010.
Vindur
Meðalvindhraði var um 0,6 m/s undir meðallagi áranna 1961 til 1990 og á sjálfvirku stöðvunum var hann 0,9 m/s undir meðallagi síðustu tíu ára. Austlægar áttir voru ríkjandi alla daga mánaðarins nema fjóra. Mjög hvasst af austri var víða um land þann 7. og 8.
Loftþrýstingur
Meðalloftþrýstingur í Reykjavík mældist 998,1 hPa og er það 2,2 hPa undir meðallagi áranna 1961 til 1990. Lægstur mældist þrýstingurinn á Gufuskálum þann 25., 965,8 hPa, en hæstur 1027,9 hPa á Egilsstaðaflugvelli þann 15.
Snjór
Alhvítir dagar í Reykjavík voru 12, þremur færri en að meðallagi 1971 til 2000, snjómagn var þó í meðallagi. Á Akureyri voru alhvítu dagarnir 23 og er það í meðallagi.
Skjöl fyrir janúar
Meðalhiti á sjálfvirkum veðurstöðvum í janúar 2016 (textaskjal).
Þessa grein, Tíðarfar í janúar 2016, er einnig hægt að lesa sem pdf (0,3 Mb).
Daglegt yfirlit mánaðarins á fjórum ákveðnum veðurstöðvum má sækja í sérstaka töflu.
