Fréttir
Veðurspálíkan uppfært
Háupplausnarveðurspá að 66 klst
Veðurspálíkan Veðurstofunnar, Harmonie, var uppfært úr útgáfu 38h1.1 í 38h1.2 í lok september og í síðustu viku var spátími lengdur um 18 klst. eða að 66 klst.
Þetta þýðir að veðurþáttakort og staðaspár byggjast nú á veðurlíkani sem keyrt er í neti með 2,5 km láréttri möskvastærð fyrstu 66 klst, en síðar á veðurlíkani Reiknimiðstöðvar evrópskra veðurstofa, ECMWF, sem er keyrt með 16 km möskvastærð.
Spásvæði Harmonie var stækkað til að bæta klakkaúrkomuspár (skúrir og él). Einnig voru gerðar ýmsar uppfærslur á innlagsgögnum sem lýsa landinu, s.s.
- Jökulþekja uppfærð og snjóþekja endurbætt
- Gróður-, sand- og leirþekjur endurbættar í samstarfi við LBHÍ
- Dökkum sandi bætt við sem landgerð og endurkastseiginleikar uppfærðir
- Hrýfi landsins látið stýra lækkun vindhraða við yfirborð
- Hæðarlíkan uppfært
Þessum breytingum á landgerð verða gerð skil í fróðleiksgrein mjög fljótlega.
Almennar upplýsingar
Leiðbeiningar með margvíslegum tölvuspákortum fyrir veður er að finna í sérstakri fróðleiksgrein.
