Jarðskjálftahrina við Herðubreiðartögl
Hrina síðan á laugardag
Jarðskjálftahrina við Herðubreiðartögl heldur áfram en virðist vera í rénun.
Yfir 500 skjálftar mældust frá því snemma á laugardagsmorgun og fram á hádegi á sunnudag og aðfaranótt sunnudagsins varð skjálfti af stærð 3,9. Ein tilkynning barst frá Akureyri um að sá skjálfti hefði fundist.
Líklegt er að nokkuð verði um smáskjálfta á næstu dögum en undanfarinn sólarhring hafa aðeins fáir náð stærðinni tveir og síðan í morgun hefur hrinan rénað mjög. Engin mælanleg merki eru um að þessi hrina muni leiða til eldgoss.
Það er mikilvægt að hafa í huga að slíkar jarðskjálftahrinur eru algengar á eldgosabeltinu norðan Vatnajökuls. Veðurstofan heldur áfram að fylgjast náið með þróuninni og mun senda tilkynningar ef aðstæður breytast.
Rauntímakort af jarðskjálftavirkni síðustu 48 klst. má sjá á vefnum (óyfirfarnar frumniðurstöður).
