Alþjóðlega ráðstefnan 2014 um aðlögun að breytingum á veðurfari
Þriðja norræna alþjóðlega ráðstefnan um veðurfarsbreytingar og aðlögun að þeim
Veðurstofan vill enn og aftur vekja athygli á þriðju norrænu alþjóðlegu ráðstefnunni um veðurfarsbreytingar og aðlögun að þeim, sem haldin verður á sumri komanda. Heiti ráðstefnunnar er: The 3rd Nordic International Conference on Climate Change Adaptation “Adapting to Change: From Research to Decision-making."
Ráðstefnan verður haldin í Kaupmannahöfn 25. - 27. ágúst 2014.
Útdrætti erinda skal skilað inn fyrir 15. apríl og skráning er hafin. Allar nánari upplýsingar er að finna á vefsíðu ráðstefnunnar og á nýuppfærðu kynningarskjali, sjá einnig eldri tilkynningu.
Umræðuefni
Eitt af helstu umræðuefnum ráðstefnunar verður úttektarskýrsla IPCC, milliríkjanefndarinnar um loftslagsbreytingar, en skýrslan er sú fimmta í röðinni og gengur undir heitinu AR5. Síðastliðið haust samþykktu aðildarþjóðir Sameinuðu þjóðanna samantekt vinnuhóps I um breytingar á jarðeðlis- og jarðefnafræðilegum kerfum. Vinnuhópur II fjallar um lífríkið og samantekt hans var samþykkt nýlega.
Það er þekkt og almennt viðurkennt að áhrif veðurfarsbreytinga á samfélagið geta skipt miklu máli, einkum það sem gerist sjaldan en hefur mikil áhrif, svo sem stormar og flóð. Þó er sjaldan litið til þessara þátta í ákvarðanatöku. Því veldur meðal annars lítill skilningur á óvissuþáttunum. Hvernig er best að heimfæra veðurfarsbreytingar upp á samfélagið og gera úr þeim hagnýtar og þrepaskiptar upplýsingar fyrir hin ýmsu svið þjóðfélagsins? Umræðuefni sem falla undir þetta eru t.d.:
- Áhættufælni og félagsleg forgangsröðun sem drifkraftur aðlögunar
- Kostnaður við aðgerðaleysi
- Áhættustýring sem tæki til ákvarðanatöku
- Öfgar í veðri – verstu atburðir
- Sviðsmyndir mestu losunar
- Stjórnun samhliða atburða
Tímabært er að skilgreina og innleiða ferli sem miða að því að hámarka aðlögun að breytilegu veðurfari á sveigjanlegan og sjálfbæran hátt.
Síðasta ráðstefna af þessum toga var haldin í Helsinki árið 2012 (sjá eldri frétt).
Tengiliðir á Veðurstofunni eru þau Sigrún Karlsdóttir náttúruvárstjóri og Halldór Björnsson, verkefnisstjóri loftslagsrannsókna.
