September 2009
Stutt tíðarfarsyfirlit ásamt sumaryfirliti
Mánuðurinn var fremur hlýr um land allt, hlýjastur að tiltölu austanlands, en svalastur á Vestfjörðum. Úrkoma var í ríflegu meðallagi en sólskinsstundir með færra móti um landið sunnanvert.
Meðalhitinn í Reykjavík var 8,4 stig og er það 1,0 stigi ofan meðallags áranna 1961-1990, heldur kaldara en á síðasta ári en öllu hlýrra en í hitteðfyrra. Á Akureyri var meðalhitinn 7,9 stig eða 1,5 stigi ofan meðallags. Á Höfn í Hornafirði var meðalhitinn 8,7 stig, 1,0 stigi ofan meðallags, eins og í Reykjavík. Á Hveravöllum var meðalhiti septembermánaðar 3,5 stig og er það 1,1 stigi ofan meðallags. Meðaltal fleiri stöðva má sjá í töflu.
Meðalhiti á nokkrum veðurstöðvum, vik frá meðallagi og staða
| stöð | t | vik | röð | af |
| Reykjavík | 8,4 | 1,0 | 41 | 139 |
| Stykkishólmur | 7,9 | 1,1 | 52 | 164 |
| Bolungarvík | 6,9 | 0,7 | 50 | 113 |
| Akureyri | 7,9 | 1,5 | 43 | 128 |
| Egilsstaðir | 7,9 | 1,7 | 15 | 60 |
| Dalatangi | 8,5 | 1,9 | 12 | 72 |
| Höfn í Hornaf. | 8,7 | 1,0 | ||
| Stórhöfði | 8,5 | 1,2 | 32 | 133 |
| Hveravellir | 3,5 | 1,1 | 15 | 45 |
Úrkoma og sólskinsstundir
Úrkoma í Reykjavík mældist 78,4 mm, en það er 17% umfram meðallag. Þetta er innan við helmingur þess sem mældist í september, bæði í fyrra og hitteðfyrra, en þeir mánuðir voru óvenjuúrkomusamir. Úrkoman á Akureyri mældist 41,2 mm og er það um 6% umfram meðallag.
Sólskinsstundir í Reykjavík mældust 72, það er 53 stundum minna en í meðalárferði. Sólskinsstundir hafa ekki verið svo fáar í september síðan 1996. Í september 2002 voru sólskinsstundirnar þó litlu færri en nú. Á Akureyri mældust sólskinsstundirnar 110, það mesta frá september 2003 og 24 stundir umfram meðallag.
Vindhraði í september var undir meðallagi og mánuðurinn sá hægasti síðan 2002.
Hæsti og lægsti hiti mánaðarins
Framan af mánuðinum var mjög hlýtt í veðri og var óvenjuhlýtt í vikunni fyrir miðjan mánuð, síðustu dagana var hins vegar óvenjukalt miðað við árstíma.
Hæsti hiti sem mældist í mánuðinum var 22,4 stig og var það í Ásbyrgi þann 13. Hæsti hiti á mannaðri veðurathugunarstöð mældist 20,4 stig, það var á Skjaldþingsstöðum í Vopnafirði þann 12.
Lægsti hiti í mánuðinum mældist -11,5 stig og var það í Sátu, skammt norðan Hofsjökuls, þann 28. Lægsti hiti í byggð, -8,2 stig, mældist í Árnesi og Kálfhól þann 29. Báðar stöðvarnar eru í uppsveitum Árnessýslu. Lægstur hiti á mannaðri veðurstöð mældist á Torfum í Eyjafirði þann 28., -7,5 stig.
Sumarið (júní til september)
Sumarið var hlýtt, í Reykjavík er það hið 10. til 11. hlýjasta frá upphafi samfelldra mælinga 1871 og það fjórða hlýjasta frá nýliðnum aldamótum. Meðalhiti sumarsins í Reykjavík var 10,7 stig og er það 1,4 stig yfir meðallagi. Ekki varð alveg jafnhlýtt að tiltölu á Akureyri, meðalhiti sumarsins þar var 9,8 stig, 0,8 stigum yfir meðallagi.
Úrkoman í Reykjavík mældist 171 mm og er það um fjórðungi undir meðallagi. Þetta er þurrasta sumar frá 1988 að telja, ámóta þurrt var þó sumarið 1994. Á Akureyri mældist úrkoman 130 mm og er það í meðallagi.
Sólskinsstundir í Reykjavík mældust 709 og er það 106 stundum umfram meðallag. Sólskinsstundir hafa alloft mælst fleiri en nú í júní til september, m.a. bæði í fyrra og hitteðfyrra. Á Akureyri mældust sólskinsstundir sumarsins 599 en það er 43 stundum umfram meðallag og munar mest um sólríkan júlí. Mikið sólarleysi var hins vegar á Akureyri í ágúst.
