Aukin rafleiðni og gasmengun við Múlakvísl
Uppfært 1. september
Undanfarna sólarhringa hefur rafleiðni í Múlakvísl mælst há miðað við árstíma. Leiðnin hefur mælst í kringum 250-270 μS/cm síðan 30. ágúst. Leiðnimælingar segja til um magn jarðhitavatns í ám og há gildi benda til þess að jarðhitaleki sé í gangi líkt og var þann 19. ágúst síðastliðinn. Vatnshæð hefur ekki hækkað samhliða aukinni leiðni en ekki er hægt að útiloka að slíkt gerist þegar fram líða stundir. Hlaup af þessari stærðargráðu eru vel þekkt í Múlakvísl.
Mikil gasmengun fylgir þessum jarðhitaleka að þessu sinni en Veðurstofan er með gasmæli við Láguhvola sem eru um 2 km frá jökuljaðri Kötlujökuls. Í nótt mældist aukning í brennisteinsvetni (H2S) og er það nú komið yfir heilsuverndarmörk. Því er varhugavert að staldra við nálægt ánni eða vera nálægt upptökum hennar við jökuljaðarinn. Á svæðinu er hægur vindur eða jafnvel logn svo gas mun safnast fyrir í lægðum í landslagi sem getur verið mjög varhugavert fyrir ferðalanga á svæðinu. Ef fólk finnur fyrir einkennum, svo sem sviða í nefi eða augum, á að yfirgefa svæðið strax.
Sólarhringsvakt Veðurstofu Íslands fylgist áfram með mælingum á svæðinu og sendir út nýjar upplýsingar ef breytingar verða.
Uppfært 21. ágúst
Útlit fyrir að jökulhlaup í Múlakvísl sé í rénun
Jökulhlaupið í Múlakvísl, sem hófst 18. ágúst, virðist nú vera í rénun. Dregið hefur úr bæði rafleiðni og rennsli frá því í gær og lítið gas mælist nú á svæðinu. Enn er þó of snemmt að segja til um hvort atburðinum sé lokið. Ferðamenn eru áfram hvattir til að sýna aðgát og yfirgefa svæðið verði þeir varir við einkenni sem gætu bent til gasmengunar. Veðurstofan mun áfram fylgjast náið með svæðinu og veita upplýsingar um framvindu eftir því sem tilefni er til.
Línuritið sýnir rafleiðnimælingar í Múlakvísl við Þjóðveg 1 frá 17. ágúst þar til í morgun 21. ágúst.
Vatnshæð í ánni jókst ekki að ráði en áin dreifði úr sér sem benti til þess að rennsli hafi aukist. Vefmyndavél Veðurstofunnar á Láguhvolum sýnir þetta á meðfylgjandi myndum.
Myndin vinstra megin sýnir Múlakvísl við Láguhvola og hægra megin við Þjóðveg 1 frá 18. - 21. ágúst
Uppfært 20. ágúst
Aukið rennsli og mikil gasmengun í Múlakvísl
Jökulhlaupið sem hófst í Múlakvísl þann 18. ágúst heldur áfram. Síðan í gær hefur rafleiðni og rennsli í ánni aukist og áfram mælist gasmengun á svæðinu. Í gærkvöldi hækkaði rafleiðni nokkuð skarpt og mælist nú rúmlega 500 µS/cm sem er óvenju hátt miðað við síðustu hlaup í ánni. Síðast mældist rafleiðni svipað há í hlaupinu í júlí 2017 en þá toppaði hún í 580 míkróS/cm.
Rafleiðnimælingar í Múlakvísl við Þjóðveg 1 frá 17. ágúst þar til í morgun 20. ágúst.
Að svo stöddu hefur vatnshæð í ánni ekki aukist að ráði en á vefmyndavélum sést að áin hefur dreift úr sér sem bendir til þess að rennsli hafi aukist.
Allmörg hverasvæði eru þekkt undir Mýrdalsjökli. Sírennsli er frá þessum svæðum og fer það eftir landslaginu á hverjum stað hvort bræðsluvatnið safnast fyrir eða ekki. Misjafnt er hversu mikið vatn safnast fyrir í þessum lónum áður en hleypur úr þeim og einnig hversu hratt þau tæmast.
Hlaup af þessari stærðargráðu eru vel þekkt í Múlakvísl. Mikil gasmengun fylgir hlaupinu að þessu sinni, Því er varhugavert að staldra við nálægt ánni eða vera nálægt upptökum hennar við jökuljaðarinn. Hægviðri undanfarna daga eykur einnig hættuna á að gas safnist fyrir í lægðum. Ef fólk finnur fyrir einkennum, svo sem sviða í nefi eða augum, á að yfirgefa svæðið strax.
Veðurstofan fylgist grant með þróuninni og er í beinum samskiptum við Almannavarnir.
Kortið sýnir staðsetningu vefmyndavélar og rafleiðnimælis.
Frétt frá 19. ágúst
Lítið hlaup í Múlakvísl
Undanfarna sólarhringa hefur rafleiðni í Múlakvísl hækkað jafnt og þétt og er orðin óvenju há miðað við árstíma en hún mælist um 285 míkróS/cm. Leiðnimælingar segja til um magn jarðhitavatns í ám og há gildi benda til þess að lítið jökulhlaup sé í gangi. Að svo stöddu hefur vatnshæð í ánni ekki hækkað samhliða leiðniaukningunni en mögulegt er að það geti gerst á næstu dögum.
Hlaup af þessari stærðargráðu eru vel þekkt í Múlakvísl. Mikil gasmengun fylgir hlaupinu að þessu sinni, en Veðurstofan er með gasmæli við Láguhvola sem eru um 2 km frá jökuljaðri Kötlujökuls. Í nótt mældist brennisteinsvetni (H2S) þar yfir heilsuverndarmörkum. Því er varhugavert að staldra við nálægt ánni eða vera nálægt upptökum hennar við jökuljaðarinn. Hægviðri undanfarna daga eykur einnig hættuna á að gas safnist fyrir í lægðum. Ef fólk finnur fyrir einkennum, svo sem sviða í nefi eða augum, á að yfirgefa svæðið strax.
Sólarhringsvakt Veðurstofu Íslands fylgist áfram með mælingum á svæðinu og sendir út nýjar upplýsingar ef breytingar verða.
Appelsínugulir þríhyrningar tákna jarðskjálftamæla VÍ í kringum Mýrdalsjökul. Gasmælirinn við Láguhvola er sunnan Kötlujökuls á sama stað og skjálftamælirinn sem merktur er Hvo á kortinu.
