Lægsti loftþrýstingur sem mælst hefur í október
Óveðrið 14. október olli tjóni þótt það teljist ekki meðal verstu októberillviðra á landsvísu.
Óveður 14.október 2026
Austan og norðan stormur gekk yfir landið miðvikudaginn 14. október. Spár um veðrið og tímasetningar þess gengu að miklu leyti eftir. Í heild voru gefnar út 12 gular viðvaranir og 4 appelsínugular vegna vinds, rigningar og hríðar. Einnig var gefin út gul skriðuviðvörun fyrir norðan- og sunnanverða Austfirði. Jarðvegur var víða blautur eða vatnsmettaður eftir úrkomu síðustu vikna og því taldar auknar líkur á skriðum og grjóthruni vegna frekari rigningar.
Lægsti loftþrýstingur sem mælst hefur í október
Lægðin var óvenju djúp. Loftþrýstingur féll hratt og fór lægst í 934,6 hPa á Fagurhólsmýri kl. 17. Það er lægsti loftþrýstingur sem mælst hefur í októbermánuði. Fyrra met var 938,4 hPa á Stórhöfða þ. 19. október 1963.
Loftþrýstingurinn fór einnig niður fyrir fyrra metið á fleiri stöðvum á sunnan- og austanverðu landinu: á Vatnsskarðshólum (935,0 hPa), Kirkjubæjarklaustri (935,6 hPa), Höfn í Hornafirði (935,8 hPa), Önundarhorni (937,7 hPa), Teigarhorni (937,9 hPa) og á Kambanesi (938,3 hPa).
Hvassviðri og miklar hviður
Ein leið til að bera saman styrk og útbreiðslu illviðra er að skoða hlutfall veðurstöðva þar sem vindhraðinn fer yfir 20 m/s. Í óveðrinu fór vindhraði yfir þau mörk á tæplega 40% stöðva landsins. Á þann mælikvarða var veðrið ekki meðal verstu illviðra sem gengið hafa yfir landið í október.
Mesti vindhraði á landinu mældist 42,0 m/s á Stórhöfða. Mesta hviða mældist 56,9 m/s kl. 7:20 á stöð Vegagerðarinnar við Hvamm undir Eyjafjöllum. Meðalvindur mældist yfir 25 m/s á 48 stöðvum og hviður fóru yfir 30 m/s á 136 stöðvum á meðan lægðin gekk yfir.
Hvassviðrið olli miklum skemmdum á Siglufirði. Á veðurstöð Veðurstofunnar á Siglufirði mældist mesti vindhraði 20,9 m/s og hviður fóru mest í 40 m/s. Þar hefur bæði vindhraði og hviður mælst meiri í októbermánuði. Vindhviða hefur þó ekki mælst eins mikil á Siglufirði síðan í október 2009.
Mikil úrkoma, sjávarflóð og hríð
Talsverð úrkoma fylgdi óveðrinu, þá sérstaklega á Austfjörðum og Suðausturlandi þar sem úrkomuákefðin var einna mest. Úrkoma mældist hátt í 70 mm frá klukkan 8 um morguninn fram að hádegi í Neskaupstað og á Fáskrúðsfirði.
Sjávarflóða varð einna helst vart í Vík í Mýrdal þar sem flæddi að húsum og yfir vegi.
Með deginum kólnaði eins og spáð var og þá snjóaði til fjalla og einnig víða á láglendi norðanlands. Um kvöldið skall á hríðarveður á norðvestanverðu landinu sem dreifði sér til austurs um allt norðanvert landið um nóttina.
Síðustu viðvaranirnar runnu úr gildi um hádegi í dag.
Gervitunglamynd kl. 12:42 þann 14. október 2026. Skýjakerfi djúpu lægðarinnar myndar greinilegan spíral sunnan við Ísland og skýjabreiðan nær yfir stóran hluta landsins.
