Páll Bergþórsson, veðurfræðingur og síðar veðurstofustjóri (1989-1993), skýrir veðurkort í sjónvarpssal árið 1974. Veðurspár í sjónvarpi hófust 6. febrúar 1967. Veðurfræðingur skýrði þar kort sem sýndu veðrið á landinu og umhverfis það eins og það var samkvæmt síðustu veðurskeytum. Siðan var sýnt sérstakt spákort sem sýndi hvernig veðurfræðingurinn hugsaði sér veðrið að sólarhring liðnum. Í fyrstu voru veðurfregnir í sjónvarpi aðeins þrjá daga vikunnar; mánudaga, miðvikudaga og föstudaga. Páll taldi að veðurfregnir í sjónvarpi hefðu aukið skilning manna á veðurfræði og veðurspám og fólk hefði þar af leiðandi meira gagn af spánum en áður.