Sérfræðingur í haffræði og líkanreikningum
Veðurstofa Íslands auglýsir eftir sérfræðingi á þjónustu- og rannsóknasvið til þess að taka þátt í uppbyggingu spálíkana fyrir sjávarhæð og tengdum verkefnum. Í boði er spennandi, krefjandi og fjölbreytt framtíðarstarf.
Hlutverk þjónustu- og rannsóknasviðs er að skilgreina, móta, leiða og taka þátt í rannsóknar- og þróunarverkefnum er varðar alla helstu eðlisþætti jarðar. Verkefni sviðsins snúa einnig að almennum grunnrannsóknum og vísindalegri úrvinnslu gagna, líkanagerð, ásamt þróun afurða og aðferðafræði til að bæta þjónustu stofnunarinnar, til viðbótar við að mæta þörfum samfélagsins. Verkefnin sviðsins tengjast m.a. veður- og loftslagsrannsóknum, jökla-, vatna- og haffræði, ofanflóðaverkefnum, jarðskorpuhreyfingum og eldgosum. Jafnframt er rauntímavöktun á veðri og náttúruvá sinnt á sviðinu.
Veðurstofa Íslands er opinber stofnun sem heyrir undir Umhverfis- orku- og loftslagsráðuneytið. Á Veðurstofunni starfa um 160 manns, þar af rúmlega 100 á þjónustu- og rannsóknasviði, með fjölbreytta menntun og starfsreynslu sem spannar mörg fræðasvið vísinda og sérfræðiþekkingar. Auk þess starfa um 50 manns við athugana-og eftirlitsstörf víðsvegar um landið. Nánari upplýsingar um stofnunina má finna á heimasíðu hennar www.vedur.is
Helstu verkefni og ábyrgð
Leiðandi hlutverk í þróun rauntíma sjávarhæðarreikninga og vinnslu sjávarflóðahættumats, sem og upplýsinga til almennings og hagsmunaaðila. Þátttaka í úrvinnslu og greiningu haffræðigagna sem og í stefnumótun á þróun aðferða í vöktun hafíss og sjávarflóða, ásamt skýrslu- og greinaskrifum. Sérfræðingurinn mun taka þátt í samstarfi við innlenda aðila sem sinna rannsóknum og eftirliti á ástandi sjávar á íslenskum hafsvæðum og eftirliti á útbreiðslu hafíss, auk þess að vera virkur í alþjóðlegu samstarfi á sviði haffræði, s.s. á vegum Copernicus áætlunarinnar, norðurslóðarannsókna og fjarkönnun (s.s. EUMETSAT). Starfinu fylgir verkefnisstjórn tilgreindra verkefna.
Hæfniskröfur
Meistarapróf í haffræði, jarðeðlisfræði, stærðfræði eða skyldum greinum sem nýtast í starfi. Doktorspróf er kostur.
Hæfni í mannlegum samskiptum
Hæfni til að vinna sjálfstætt sem og í teymisvinnu
Færni og geta til að miðla niðurstöðum innan teymis og út á við
Skipulögð og fagleg vinnubrögð í starfi
Frumkvæði og faglegur metnaður
Góð tölvukunnátta, þ.á.m. forritunarkunnátta (Unix/Linux)
Góður bakgrunnur í eðlisfræði og stærðfræðigreiningu
Góð færni í íslensku og ensku nauðsynleg
Kunnátta í norðurlandamálum er kostur
Í gildum Veðurstofunnar er lögð áhersla á að vera áreiðanleg, samvinnufús og hugvitsöm. Ráðningar taka mið af þessum gildum.
Frekari upplýsingar um starfið
Laun samkvæmt gildandi kjarasamningi sem fjármála- og efnahagsráðherra og viðkomandi stéttarfélag hafa gert.
Við hvetjum fólk af öllum kynjum að sækja um starfið.
Umsókninni þarf að fylgja starfsferilskrá þar sem gerð er grein fyrir ástæðu umsóknar og rökstuðningur fyrir hæfni í starfið.
Starfshlutfall er 100%
Umsóknarfrestur er til og með 07.04.2026
Nánari upplýsingar veitir
Tinna Þórarinsdóttir
Deildarstjóri
Tölvupóstur: tinna@vedur.is
Sími: 5226000
Borgar Ævar Axelsson
Mannauðsstjóri
Tölvupóstur: borgar@vedur.is
Sími: 5226000
