Tíðarfar í nóvember 2013
Stutt yfirlit
Tíð var rysjótt í nóvember. Venju fremur kalt var í kringum miðjan mánuð en síðasta vikan var mjög hlý. Úrkoma var yfir meðallagi um meginhluta landsins, en náði þó ekki meðallagi sums staðar fyrir norðan.
Hiti
Meðalhiti í Reykjavík var 2,2 stig. Það er 1,1 stigi ofan meðallags áranna 1961 til 1990 en 0,1 stigi undir meðallagi síðustu tíu ára. Nokkru kaldara var í nóvember í fyrra heldur en nú. Meðalhiti á Akureyri var 0,5 stig, það er 0,8 stigum ofan meðallagsins 1961 til 1990 og 0,2 stigum ofan meðallags síðustu tíu ára. Í Stykkishólmi var meðalhiti 1,6 stig, 0,7 stigum ofan meðallags 1961 til 1990. Á Höfn í Hornafirði var meðalhitinn 1,9 stig og -4,0 á Hveravöllum.
Meðalhita og vik á fleiri stöðvum má sjá í töflu.
| stöð | hiti | vik | röð | af |
| Reykjavík | 2,2 | 1,1 | 44 til 45 | 143 |
| Stykkishólmur | 1,6 | 0,7 | 65 | 168 |
| Bolungarvík | 0,7 | -0,2 | 68 til 69 | 116 |
| Akureyri | 0,5 | 0,8 | 53 | 132 |
| Egilsstaðir | 0,1 | 0,8 | 27 til 28 | 59 |
| Dalatangi | 2,4 | 0,6 | 42 | 75 |
| Teigarhorn | 1,8 | 0,5 | 74 | 141 |
| Höfn í Hornaf. | 1,9 | |||
| Stórhöfði | 3,2 | 0,8 | 51 til 52 | 136 |
| Hveravellir | -4,0 | 0,8 | 22 til 23 | 48 |
| Árnes | 0,2 | 0,5 | 65 | 134 |
| Byggð | 0,9 | 0,6 |
Hæstur var meðalhiti mánaðarins í Surtsey, 4,4 stig, og 3,9 á Garðskagavita. Lægstur var meðalhitinn í Sandbúðum, -6,1. Í byggð var meðalhitinn lægstur í Möðrudal, -3,6 stig.
Hæsti hiti mánaðarins mældist á sjálfvirku stöðinni á Dalatanga þann 26., 20,2 stig. Á mannaðri stöð mældist hitinn hæstur 19,0 stig þann 27. á Dalatanga.
Lægsti hiti mánaðarins mældist -22,5 stig á Brúarjökli þann 9. Í byggð mældist lægsti hiti -20,0 stig við Mývatn og á Grímsstöðum á Fjöllum þann 18. og á Grímsstöðum þann 10. Lægsti hiti á mannaðri stöð mældist -19,5 stig í Stafholtsey þann 9. og 10.
Hitinn á Dalatanga þann 27. er nýtt landsdægurmet (hæsti hámarkshiti 27. nóvember). Eldra met var frá Skjaldþingsstöðum árið 1994, 14,5 stig.
Úrkoma
Úrkoma var yfir meðallagi um mestallt land nema á Norðurlandi austanverðu þar sem hún var heldur minni en í meðallagi. Úrkoma mældist 92,7 mm í Reykjavík og er það um 28 prósent umfram meðallag. Þetta er svipað og í nóvember í fyrra og hitteðfyrra. Í Stykkishólmi mældist úrkoman 87,3 mm og er það 30 prósent umfram meðallag. Á Akureyri mældist úrkoma í nóvember 51,1 mm og er það í rétt tæpu meðallagi. Úrkoman á Höfn í Hornafirði mældist 136,7 mm.
Dagar þegar úrkoma mældist 1 mm eða meiri voru 18 í Reykjavík, þremur fleiri en í meðalári. Á Akureyri voru slíkir dagar 13, einnig þremur fleiri en í meðalári.
Sólskinsstundafjöldi
Sólskin í Reykjavík mældist í 35,4 stundir, 3 stundum færri en í meðalári. Á Akureyri mældust sólskinsstundirnar 13,5, einni færri en í meðalnóvember.
Snjólag
Alhvítt var fimm daga í Reykjavík og er það tveimur dögum undir meðallagi áranna 1971 til 2000. Á Akureyri voru alhvítu dagarnir 23 og er það 7 dögum fleiri en að meðaltali í nóvember 1971 til 2000.
Vindhraði og loftþrýstingur
Vindhraði á landinu var um 0,4 m/s yfir meðallagi. Sá 9. var hægastur daga í mánuðinum en 27. sá hvassasti. Meðalloftþrýstingur í Reykjavík var 1001,6 hPa og er það 2,5 hPa undir meðallagi. Hæstur þrýstingur í mánuðinum mældist 1034,8 hPa á Egilsstaðaflugvelli þann 23. en lægstur mældist hann 956,4 hPa á Gufuskálum þann 11.
Haustið (október og nóvember)
Tíð var býsna breytileg. Þurrt var á Suður- og Vesturlandi í október en úrkoma í nóvember var yfir meðallagi. Hiti var ekki fjarri meðallagi en hitasveiflur voru miklar. Meðalhiti í Reykjavík var 3,22 stig og er það 0,5 stigum ofan meðaltals áranna 1961 til 1990 en 0,3 undir meðalhausti síðustu tíu ára. Á Akureyri var meðalhiti haustsins 1,6 stig og er það 0,3 stigum ofan meðaltals áranna 1961 til 1990, en 0,4 undir meðallagi síðustu tíu ára.
Fyrstu ellefu mánuðir ársins 2013
Meðalhiti í Reykjavík fyrstu 11 mánuði ársins 2013 er 5,44 stig, það er 0,7 stigum ofan meðaltals áranna 1961 til 1990. Árið, það sem af er, er í 30. til 32. sæti hlýrra ára í Reykjavík (af 143), en það þriðja kaldasta á þessari öld (af 13). Á Akureyri er meðalhitinn á sama tíma 4,57 stig og er það 0,5 stigum ofan meðallagsins 1961 til 1990, það fimmta kaldasta á þessari öld. Úrkoma það sem af er ári er um 30 prósent umfram meðallag á Akureyri en 20 prósent umfram það í Reykjavík.
Skjöl fyrir nóvembermánuð
Meðalhiti á sjálfvirkum stöðvum í nóvember 2013.
Þessa grein, Tíðarfar í október 2013, má einnig lesa sem pdf-skjal (0,3 Mb)
