Tíðarfar árið 2010
Stutt yfirlit
Veðurfar var óvenjulegt árið 2010, sérstaklega um landið sunnan- og vestanvert. Í þeim landshlutum var það eitt hið hlýjasta sem vitað er um, jafnframt eitt hið þurrasta og snjóléttasta. Ársmeðalloftþrýstingur hefur aldrei mælst jafnhár og nú. Árið var einnig óvenju hægviðrasamt.
Hiti
Meðalhiti í Reykjavík var 5,9 stig og hefur aðeins einu sinni verið marktækt hærri. Það var 2003. Tvisvar sinnum, 1939 og 1941, hefur hitinn verið jafnhár og nú. Árið telst því í 2. til 4. sæti hvað hlýindi varðar. Hiti hefur nú verið yfir meðallagi í Reykjavík 15 ár í röð.
Í Stykkishólmi varð meðalhiti árins 5,3 stig. Árið er það næsthlýjasta síðan mælingar hófust í Stykkishólmi 1845, lítillega hlýrra varð 2003. Á Akureyri var meðalhitinn 4,3 stig og er 12. árið í röð þar sem hiti er yfir meðallagi. Í Vestmannaeyjum varð árið það 4. hlýjasta frá upphafi mælinga (1877), en munurinn á þessum fjórum árum er vart marktækur.
Úrkoma
Árið var í flokki þeirra þurrustu á Suðvestur- og Vesturlandi. Þegar þetta er skrifað (29. desember) hefur úrkoma á árinu mælst 591,1 mm í Reykjavík. Ef spá um úrkomu síðustu tvo dagana stenst verður ársúrkoman um 593 mm og sú næstminnsta sem vitað eru um. Úrkoma var minni 1951 þegar hún mældist 560,3 mm. Tvisvar hefur ársúrkoman orðið nærri því jafnlítil og nú. Það var 1891, þegar hún mældist 595,0 mm, og 1960 þegar hún mældist 596,6 mm. Næsta ár þar fyrir ofan er 1965 með 610,1 mm. Í Reykjavík eru samfelldar úrkomumælingar frá 1920 og frá 1884 til 1907, en árin þar á milli vantar. Á því tímabili voru öll árin 1915, 1916 og 1917 mjög þurr um landið vestanvert og trúlegt að að minnsta kosti eitt þeirra hafi verið þurrara í Reykjavík en árið í ár. Úrkoma í Reykjavík var undir meðallagi í öllum mánuðum nema janúar og september.
Í Stykkishólmi hefur úrkoma verið mæld samfellt að heita má frá 1856. Árið 2010 virðist ætla að verða það fimmta þurrasta þar frá upphafi. Þurrara var 1881, 1915, 1916 og 1998. Úrkoma árin 1878 og 1951 var þó nærri því jafn lítil og nú og er enn mögulegt að endanleg úrkoma verði meiri en þessi ár (5 og 6 mm vantar upp á).
Í Vestmannaeyjum var úrkoman í ár um 85% meðalúrkomu, sú minnsta frá 1995. Í Vestmannaeyjum hefur verið mælt frá 1880.
Þótt ekki sé hægt að segja að árið hafi verið mjög úrkomusamt á Norðaustur- og Austurlandi hefur úrkoma á þeim slóðum verið yfir meðallagi. Um 6% yfir á Akureyri og um 16% á Dalatanga. Norðaustanlands var úrkoman mjög ójöfn því janúar og júní voru fádæma þurrir í þeim landshluta.
Snjór
Snjór var með minnsta móti á Suður- og Vesturlandi og alhvítir dagar í Reykjavík ekki nema 16 (þegar þetta er skrifað). Svo fáir hafa alhvítir dagar aldrei verið í Reykjavík frá upphafi snjóhuluathugana þar 1921. Á Akureyri var fjöldi alhvítra daga undir meðallagi en þó voru hvítu dagarnir þar fleiri en flest undanfarin ár.
Sólskinsstundir
Í Reykjavík mældust sólskinsstundir 1641 (til og með 28. des.). Fleiri sólskinsstundir hafa aðeins mælst fimm sinnum áður í Reykjavík en samfelldar mælingar hófust 1923. Það var árin 1924, 1927, 1931, 1966 og 2005.
Sólskinsstundir á Akureyri voru um 50 fleiri heldur en í meðalári, en langt frá meti.
Loftþrýstingur
Ársmeðalloftþrýstingur hefur ekki orðið hærri í Reykjavík frá því að mælingar hófust 1822. Sama á við um aðrar stöðvar á landinu þar sem mælingar hafa staðið skemur.
Vindhraði
Vindur var með hægasta móti á árinu, meðaltal allra mannaðra stöðva það lægsta frá 1965.
